Telpon moni pas aku lagi dines wengi nang puskesmas Pamarican. Jarku kang sapa? Ternyata kang bibi Keri sing nang Adipala, Cilacap. Ngomong suwe ngalor - ngidul lewih kang sejam. Mulai cerita kang masalah keluarga, kerja, sampeka masalah sing ora usah diomongna hahaha. Kang omongan sejam gue aku janji yen ngesuk aku rep meng umahé bibi nang Adipala.
 |
| Pantai Srandil - Adipala |
Balik jam 8 isuk langsung beres - beres perlengkapan klambi ganti, alat mandi, kamera, hammock lan alat sing liané. Motor setia Xride sing dadi kuda go lunga meng Adipala. Siki aku ngajaran lewat dalan Cingenge waduh ternyata dalané elek banget kaya kali sat. Tekan Sawitali sebutan wong Jawa padahal jenengané Ciawitali, dalan wis maen kur ana lewih kang 2 Km dalan mulai elek maning sampe pertigaan meng bendungan Menganti, arah Padaherang.
 |
| Pose Nang Srandil |
Jog Adipala jam 12 awan pas bedug duhur. Alhamdulillah tekan selamet walaupun tes dines wengi pestiné nang dalan lemes ngantuk. Upeti sing tek gawa kur rong kilo jeruk sing tek tuku nang pasar Mlewung, Kesugian. Jarku silaturahmi sing apik ya sing seana - ana udu sing diana - anakna (meksa). Bar disuguhi sega go madang awan rasa kesel lan ngantuk langsung marekna aku mabok pengin turu.
 |
| Pantai Srandil - Adipala |
Tangi turu jam 4 sore rasané penak banget. Ora ngilangna kesempatan nang Adipala, enyong ngajak Fitroh dolan meng Pantai Srandil. Pantai sing paling edhek kang Adipala. Pantai sing jere wong paling serem kerna akeh pemujaan wong - wong sing goleti dunya. Pantai muara gie jelas akeh sampah sing pada ngletak nang pinggir pesisir. pemandangan belah kidul samudra Hindia sing paling galak, sebelah kulon ana Nusakambangan lan PLTU Bunton, sebelah wetan garis pantai sampe pantai Ayah, Kebumen. Sunset wis ilang nembe balik meng umahé bibi. Ra ana kegiatan liané kur dolan lan kumpul keluarga nang umahé Kipli. Ngomong ngalor ngidul ra genah sampe aku ngantuk berat!
 |
| Pose Nang Kawah Candra Dimuka |
Isuk - isuk Kipli tek jak meng Dieng ra gelem akhiré kur aku tok sing mangkat. Mangkat jam 8 isuk ra gawa apa apa kur kamera lan klambi ganti. Sepanjang dalan kur ngrungokna lagu Jess Glynne, Celine Dion lan Clean Bandit lumayan ngehibur nang dalan. Memang bahaya sih ngrungokna lagu karo nyetir! Sampe - sampe kesenggol truk. Alhamdulillah rung mati!
Dalan sekang Banjarnegara tekan Dieng plengkang plengkung kerna gunung. Akeh pemandangan sing maen nang sepanjang dalan. Tekan dieng jam 11an wektu kae cuaca esih maen tapi mulai jam 12 udan rintik - rintik karo gldug gede. Sing ternyata ulih nyawa pendaki gunung kurang lewih 5 sing ninggal.
 |
| Candi Nang Dieng |
Pertama sing tak kunjungi plesiran nang Dieng ya gue Kawah Chandra Dimuka, dalan meng kawah gue eleké ngepol. Pokoké kudu extra ati - ati apa maning pinggir dalan jurang. Ora ana penunggu tiket sing njaga dadi aku bebas retribusi. Kawah Chandra Dimuka gie lumayan ngeri soalé kawah gue mbulak kaya banyu umeb.
Pindah maning meng kawah Sikidang sing jere kawah sing paling gede nang dataran tinggi Dieng. Aku kirim ndeleng sekang nduwur tok ra nganti tekan ngingsor. Nang kene ketemu bapak - bapak sekang Pekalongan sing agi pada nglayab, ketoné tah PNS sing agi nglayab.
 |
| Danau nang Dataran Tinggi Dieng |
Ra ana sejam tempat nang Dieng sing tak kunjungi kecuali kawasan Candi. Tes kang kawah Sikidang aku pindah meng Kawasan Candi. Nang kene uga aku ra ditagih karcis kerna memang udan dadi wong sing njaga males kerja dadi sapa bae bisa mlebu tanpa karcis. Keindahan tempat ibadah umatnya Hindu ora bisa disangkal. Temenan maen lan nduwé sejarah penting nang peradaban bangsa Jawa. Kira - kira ana lewih kang 4 Candi nang kono. Enyong kelalen maning jenengané. Tes kang kawasan candi, enyong mandan bingung arep meng endi maning. Ndeleng wektu karo cuaca sing ora maen enyong sidané balik meng Adipala. Mampir sedela tuku mie ayam khas Wonosobo.
Balik jam 3 sore tekan Adipala jam 7 wengi lumayan cuaca gerimis mulai ana sekang Banjarnegara. Isin ra ngawa jajan go bibimé akhiré tuku martabak sing murah go sarat hehehe. Ngapurané bij aku wong keré tapi pengin plesiran. Bar adus kumpul nang umahé Kipli kur sedela kerna langka wong nang umah kur ana yayu tok. Rasa lemes karo ngantuk abot banget sidané balik meng umahé bibi. Turu!
 |
| Bocah SD Wonosobo |
Isuk - isuk pamit balik kerna dina ngesuk rep mlebu kerja maning. Sekalian balik sekalian mampir meng segara Teluk Penyu, Cilacap. Kur 3 jam nang kono, nyantai nang hammock. Silaturahmi dadi iket paling kuat go keluargaku sing nang Jawa Barat lan Jawa Tengah. Mampir dadi sarat kuaté keluarga. Kerna hal gue aku uga mampir meng umahé Udin. Anaké bibiné sing ulih wong Gandrungmangu. Balik sekang Gandrungmangu jam 4 sore tekan umah jam setengah enem sore. Lumayan nang dalan pas mlebu Jawa Barat mulai udan. Tapi ra ana udan pas mlebu Banjarsari!
Komentar