Among - among yague tradisi ngemutna dina wethon lahir sing biasané dirayakna sewulan sekali. Ketentuan kang among - among gue kang tanggal lahiré dewek nganggo kalender jawa karo kalender masehi. Misalé Enyong lahir dina Ahad (kalender masehi) Wage (kalender jawa). Nah tiap dina Ahad Wage gue dina lahir ku atawa dina go among - among.
Among - among janjanéh beda mbanget karo ulang tahun nek among - among tentuné dirayakna tiap bulan (monthly) beda karo sing jenengané ultah, sistem karo cara ngrayaknané uga beda. Janjanéh among - among gue slametan cilik - cilikan sing dianakná tiap wulané pas dina kelahiran kang aturan penanggalan jawa (wethon) karo penanggalan masehi (dinané). Biasané among - among gue go bocah sing mbene lahir ket umur sewulan sampeka umur rong taun (2) sampeka telung taun (3) ana uga sing sampe limang taun (5) kaya cilikanku sampe limang taun (5).
Kepriwe sih Ang golé ngrayaknané apa kepriwe acarané? Among - among gue slametan cilik - cilikan go dede bayi apa dede bocah, dadi tamu - tamuné uga bocah apa kalangan bayi lah (ya bisa uga biyungé sing pengin nyicipi kluban). Biasané nek arep among - among wong sing duwe acara mrentah anaké sing mandan gedhe nek ora bocahéh kon ngundang batir - batiré kon pada kumpul nang enggoné deweké (ngundangé pas segané wis mateng karo kluban wis siap dadi men dipangan ésih anget tur enak). Among - among biasané ora lewih kang telungpuluh (30) wong sing diundang ya paling biasané bocah se ErTe (RT) thok. Ngomongi panganané gampang bae ngko tek jelasna maning nang ngingsor.
 |
| Lukisan Ibu lagi ngempani anake |
Sega putih nek ora sega besek (sega dicampur parudan klapa karo gesek) biasané sing dadi hidangan utama among - among arep dibentuk tumpeng apa arep diblarah - blarahna ya kena (bisa). Selain sega putih ya ana lawuhé. Endog bebek nek ora ndog pitik negri digodog terus dibagi 4-5 iris Seendogé loh (dadi irisané endog cilik cilik) lumayan lah ya go lawuh walaupun sekecrèt pisan. Nah sing paling diburu nang ibu - ibu gue kluban (sayur godog) soalé kluban paling enak nek jere wong - wong mah. Kluban go wong among - among digawe khusus biasané sayurané gue godog mangkokan (Policasias Sp), kangkung, nek ora godog cakra - cikri. Rasané kluban mangkokan gue enak ana ra getir karo pengár (abab bisa mambu apa maning banyu uyuh mambu lècit). Ora kelalen kerupuk abang disogna (disajikan) nang sanding kluban. Tumpeng among - among gie disogna nang ndwur tampah dibungkus godog gedhang. Ana sing unik maning gieh selain nganggo tampah nang ngingsor disogi baskom men aja tiba (jatuh) njero baskom biasané ana banyuné karo godong Tawa kegunaané sebeneré go wisuh tangan nek go arep madang. Ana kepercayaan uga nek banyu godong tawa dicipratna aring tamu undangan bocahéh dadi nakal (jere).
Pas upacarané. Bocah - bocah undangan wis pada kumpul biasané upacara among - among langsung dilaksanakna. Pertama - tama ana pak kaji (haji) nek ora sing dituwakna tur sing bisa donga kon mbukak acara karo ndongani, sa uwisé ndonga bocah - bocah biasané madang bareng panganan sing nang ndwur tampah gue. Bisané nek ibu - ibu njaluk dipincuk go digawa umah. Bar enthek panganané/wis rampungan bocah - bocah tamu dinaini (diwai) duit nek ora premen siji - siji, nek duit bisané 500 - sampe 1000 perak. Ya lumayan jere bocah mah gede banget lumayan go jajan.
Akeh mangfaaté kang acara among - among gue selain go syukuran meng Gusti Allah uga nyénengna bocah men duwe batir akeh, nduwéni rasa kekeluargaan (silaturahmi) lan guyub. Enyong dewek ésih kemutan banget acara among - among nang enggoné batirané dewek ya karo acara among - amongku dewek. Semoga tradisi gie ésih ana nang Kubangpari - Bangunsari ya walaupun adoh kang tanah leluhur tapi budaya tradisi ésih lestari. Artikel gie atas kepenginé Ang Rylo Pambudi putuné Kaki Kartanom anaké Mang Warsono Bandar gula kang ErTe siji Kubangpari.
Komentar