Wis ora adem maning nang Mekarmulya turu rasané gerah banget tapi ngleker mbanget soalé kesel nang dalan terus. Jago wis klarak - kluruk ket jam 5an tanda wis esuk ora akeh usik ésih mandan ngleker lanjutna maning tekan pandum moni jam setengah 6. Rasa penasaran ndleng srengengé ndongol alias sunrise nang gunung lumayan dadhi ati sregep lunga meng sawah go ndleng srengengé sing nembe ndongol. Langit cerah sisi wetan mendung sisi kulon, sinar srengengé tetap muncar kaya lampu pijar manuk, tongeret lan sakabeh khewan mulai aktivitas sedina - dina kecuali khewan wengi. Kampret.
Nyes krenyes sikil tanpa sandal ngidek lemah gunung sing memang teles kerna udan mambengi ora usah mikiri sing lia tetep maju ndleng srengengé sing ndongol kang sebelah wetan. Maning - maning anjing galak sing ngalangi dalan go meng sawah tapi akhiré sing nduwe ngusir anjingè sing bener - bener galak nglewihi galakè mertua. Rep mlebu sawah ternyata ana sing adus dadhi mandan rikuh apa maning sing adus anu wong ayu. Mbalek umah go sarapan karo pamitan.
Sarapan sega anget khas pegunungan memang nikmat golemat apamaning ditambah sambel khas Sunda. Lawuh sisa mambengi ésih nikmat dipangan. Ényong njiot sing dibakar Zaenal njiot sing digoreng. Wareg alhamdulillah. Mandan akeh omong men ana rasa pengasih antara Ényong lan Bibiné sing memang wis suwe ora dianjang umahé. Papat jepretan wis gawe memori legi karo keluarga.
Bekel aplikasi Here map karo peta sederhana kang Mamang Sardjo dadi kewanian go plesiran meng segara kidul Jawa Kulon. Peta sederhana lewih mangfaat go metu kang daerah terpencil tekan aplikasi Here map ulih dalan atawa nemukna rute. Here map nembe nemukna dalan kang wilayah Jadimulya ésih kecamatan Langkaplancar - Pangandaran. Sepanjang dalan Limus Dua tekan gunung kelir ngutamakna peta gawean mamang Sardjo lan pertakonan aring wong sing nang pinggir dalan. Akeh mbanget sing dikagumi sepanjang dalan meng segara kidul, nemu kalajengking sing ukuranè gedhe lan sawah - sawah indah khas Priangan. Ucap syukur alhamdulillah ora ana enthekè sampe poll balik meng umahé dewek - dewek.
Kurang lewih ana 1 jam 40 menit antara Limus Dua tekan pertelon Parigi lumayan cepet kang perkiraan awal. Stres kerna diomaih nang kanca kerjaan kerna miss komunikasi preian dadhi keluh sepanjang dalan, turun semangat ana kur dasar Ényong ora seneng turun harapan lan semangat ya menghibur diri karo omongan atawa karo ndleng pemandangan sing memang indah.
 |
| Pemandangan nang segara Karang Tawulan - Tasikmalaya |
Meteran bensin wis ngacungna meng huruf E siap - siap aweh nginum aring motor. Isi full thank lewih utama go perjalanan sing lumayan adoh. Rencana memang diarepna kur kondisi lan situasi sing bener - bener nentukna, Segara Garut sing dadhi tujuan utama dipikir maning ternyata ora pas karo wektu sing dijatah nang Gusti Allah. Akhiré ditentukan tekan segara Sindangkerta - Tasikmalaya. Post mandeg pertama nang daerah Legokjawa ana segara sing unik, muara kali sing bener - bener indah lan ana pulau cilik nang sisi kidul segara dadhi ciri khas dewek nang segara sing sepi gue. Sepuluh menit mandeg poto - poto karo klosehan nang suket - suket segara sing lagi pada kembang. Cukup ngasonè tinggal maju maning siki gantian nyupirè.
Mandeg maning nang segara konservasi wilayah Tasikmalaya. Segara sing garis pantai karo pasir ireng sing lumayan dawa dadhi keindahan sing gawe wong kagum apamaning ana mercusuar nang pulau cilik sebelah kulon segara. Let 20 menit jog segara sing memang bener - bener unik kerna akeh spot sing menarik, ana pulau, bukit, watu - watu erosi banyu laut, segara biasa lan lainné. karangtawulan.
Tiket mlebu janjanéh kur 5500 rupiah tapi dijaluk 10000 rupiah ora apal tarikan sing liané go ngapa lan go sapa. Ora akeh omong kur mandan miris ésih ana tarikan liar. Lumayan akeh sing plesiran rata - rata kang Bandung ketenger kang kendaraan sing digawa letter D. Selain wong sing plesiran kang lain daerah bocah - bocah sekolah sing memang lagi bolos apa memang ora diajar pada mengonoh ngawa pasangan pacar atawa karo kanca udu spesialé.
Jarak Karangtawulan meng Sindangkerta lumayan adoh apa maning ditambah cuaca sing memang pentèr (menyengat). Semangat ésih ana nang njero dada tapi rasa kencot memang mandan abot nek ditunda, ndleng - ndleng tukang mie ayam sepanjang dalan ora tau nemu, nemu malah keliwatan. Sindangkerta wis nang ngarep mata belok bae meng arah segara alhamdulillah bisa mlebu lan ternyata ora ana tarikan karcis. Mandeg nang sanding tukang bakso Solo langsung pesen langsung madang alhamdulillah wareg. Turu sejaman lumayan ana semangat sing menggebu maning. Siki maju meng sisi wetan segara Sindangkerta ndleng - ndleng karang lan biota segara. Luar biasa indah memang. Senajan Ényong wis ping pindo meng segara Sindangkerta tetap bae ésih kagum karo keindahané.
Ngitung wektu nganah - ngeneh akhiré pas balik jam 3 sore tekan segara Pangandaran jam 5 lewih pas srengengé mangslup alias sunset sedurungé nyekseni sunset madang kupat tahu gisit nang segara Pangandaran sebelah wetan sing ngadep pulau Nusakambangan - Jawa Tengah. Rasa mumet kerna mabok perjalanan 3 dina ora ana mandegè rasané mumet tapi ora ana rasa muntah jan kesiksa memang.
Perkiraan aplikasi Here map tepat lan itung - itungan ku antara perjalanan kang Karangtawulan, Sindangkerta, Pandangan tekan umah (Kemrican). Malah lewih ngirit wektu ana sekitar 30 menit. Jog Kemrican langsung bae njujugna Zaenal sing memang umahé lewih edhek kang ndalan kenimbang Ényong sing nang Kubangpari. Hawa arep udan wis mandan krasa nang wilayah Cigintung ternyata bener nang Ciodeng udan deres sampe Kantor Polisi. Wilayah pasar tekan Blater ora udan gedhe kur gerimis tok nembe jog Kubangpari udan gedhe maning. Alhamdulillah tas lan sekabehan barang ora teles kecuali klambi nang awak. Teka umah langsung adus nang sumur njaba rasané seger mbanget nglewihi nginum banyu degan. Diterusna sembayang lan dolan hendpon. Sampe keturonan. Turu lèlèt golèlet.
Komentar