"Bi War... Tuku..."
"Tuku apa Yo?"
"Tuku gowok limangatus Bi"
"Sok ngonoh milih dewek"
Gue salah siji omong-omongan aku pas mbiyen tuku gowok nang warung pinggir sekolah, aku sekolah nang MIN Kubangpari sing sa'iki ganti aran dadi MIN 4 Ciamis. Mburi sekolah meped tembokan, ana warung jajanan karo janganan, sing duwe jênêngane Bi War. Umumé bocah sekolah pada tuku panganan nang kono mbuh gue jajan pecel, bala bala (bakwan), apa jajan ciki. Bi War uga anu wong pasar dadi dèwèké doldolan janganan kaya terong, buncis, wortel, termasuk adol woh-wohan sebangsane jeruk, salak karo gowok.
Gowok didol nek musimè, umumé gowok ana pas wulan Agustus, dèwèké diunduh sekang désa Sidamulih. Desa sing paling gedhé lan paling adoh nang kecamatan Pamarican, wilayahè cocok go tanduran woh-wohan sebangsane durian, dukuh, kokosan uga gowok.
Ket cilik aku seneng banget woh-wohan terutama sing kecut, jan mbiyen nek tuku gowok bisa tekan 2000 perak atawa lewih. Kadang aku ora tuku meng warung, soalé ana bibi sing urip nang desa Sidamulih dèwèké nduwé wit gowok. Siki gowok regané larang mbiyen sing sekilo kur 5000 perak siki dadi 15000-an, larang mbok?!.
Bocah cilik biasané paling seneng mangan gowok, nek wong tuwa males mangan gowok soalé akeh sing nduwèni penyakit lambung dadi wedhi mbok kumat. Selain dipangan langsung gowok uga bisa digawé rujak bebek atawa go campuran lotis (lotek). Wong mbiyen percaya yèn mangan rujak bisa gawé kupingé cah bayi. Maksude wong mbiyen kui rujak sing sugih nutrisi vitamin becik kanggo perkembangan bayi sing nang rahim biyunge.
Sayang woh-wohan sebangsane gowok rung ana sing dadi sumber obat atawa vitamin pabrikan, kan sa'iki akeh woh-wohan atawa godhong-godhongan sing didadèkaké obat semisal wae kulit manggis, moringa sing jenengan asliné godong kelor, terus sekanca kancané. Biasané nek wis dadi bahan obat woh-wohan gue dadi payu larang. Sa'iki gowok kur naik 3 kali lipat sekang wektu aku cilik, janeh padha wae regané kur beda zaman kena inflasi. Mergo murah woh-wohan sebangsane gowok langka ditanduri nang wong desa maning soalé ora nduwèni nilai ékonomi sing apik. Melas temen yah ya ngemben bisa punah.
Komentar