Senajan urung ana penelitian sing lewih formal tentang etnis Jawa nang wilayah Kubangpari khususé Ényong wanikna diri mengungkap keanaan wong Jawa nang Kubangpari atawa nang sekitar Pamarican.
Jere mamaku sih wong Jawa nang Kubangpari gmienné teka kur go mbukak lahan karo kerja nang pabrik pospat sing ana nang desa Sidamulih. Kerna akeh sing mbukak lahan pertanian nang wilayah Banjar - Ciamis sing akeh - akehé wong Jawa kang wilayah Keresidenan Banyumas dadhi akeh wong Jawa sing netep atawa matuh urip nang Kubangpari atawa wilayah liané sing nang Jawa Barat. Perbatasan wilayah etnis atawa provinsi memang dadhi pengaruh gedhe penyebaran wong Jawa nang wilayah Ciamis.
Wong Jawa nang Pamarican atawa wilayah Ciamis akeh - akehé dadhi tukang dagang atawa dadi buruh. Mbahku gmienné ge dadhi bakul mbako, kebo lan beras. Tradisi Jawa memang ora bisa ilang langsung perlu wektu atusan taun. Siki bae tradisi Jawa nag Kubangpari khususé ésih dilestarikna ora ketang basa jawa sing memang ésih lestari.
BASA
Basa Jawa nang wilayah Ciamis khususé Pamarican memang mandan beda sipet karo basa Jawa Banyumasan sing memang dadhi induk basa Jawa nang Ciamis gie. Bedané kur ana pirang kata sing dijiot kang basa Sunda sing memang duwe pengaruh gedhe nang pergaulan sedina - dina misalé bae ana kalimat teh, mah, lan kalimat basa sunda sing liané. Selain dienggo tiap dina basa jawa uga dienggo pas khotbah jemuahan, ngaji kitab kuning atawa acara - acara sing liané.
ARSITEKTUR
Wong Jawa nang Pamarican ésih mertahana arsitektur jawa walaupun siki wis jaman modern. Umah joglo memang ora populer nang wong Jawa sing nang Pamarican tapi ya ana siji loro sing nduwéni umah joglo mungkin deweké nduwéni darah kang Jogja, Solo atawa wilayah Jawa liané sing umumé umah pada model jogloan. Umah nang Pamarican ésih akeh kang bilik lan ciri khas umah jawa sing digabung dadhi 2 umah selain umah kang bilik umah khas jawa Banyumasan uga dimoderenna dadhi wis ora nganggo bilik maning tapi karo tembok tapi tetep susunan, atap umah khas jawa ésih dipertahanna cuma siki wis langka umah jawa sing ana gununganné sing ana gambar gunungan, tanggal gawe umah atawa ana tanduk atawa sungu sing biasané disogna nang pinggir atap umah.
 |
| Nini Sarmah sang maestro budaya Kubangpari - Pamarican |
Kesenian
Kegerus nang jaman modern sing terus - terusan ngebantai lan ngegeser kesenian tradisional Jawa sing diturunna meng keturunan Jawa nang Pamarican siki kur kur cerita kejayaan thok tapi aja ciut ati gipi siki alhamdulillah kesenian jathilan/èbèg/kuda lumping dadhi tenar maning. Apa sebabé? Kemungkinan gedhe kerna hiburan semacam pongdut, campur sari atawa orkes wis ora menarik maning nang ndi - ndi ana apa maning nang tipi sing tiap dina terus disiarna. Kesenian Jawa pernah nduwéni masa kejayaan pas Ényong ésih cilik kaya ebèg, japlin, lengger, wayang lan lian sejabané. Gemien tanggaku nduwéni group kesenian lengger lan ana uga janengan sing unggal dina Ahad diunikna. Janengan biasané digelar nang umahé pak golongan (Bapak Saiman) tiap dina Ahad wengi pasti latihan sakabeh wong sing seneng kesenian pesti dolan meng enggoné mang Saiman. Lengger ana kur suwe mbanget pas Ényong ésih umur 6-8 taun sing nduwéni lengger yague Allahyarham/Jenaté Kaki Syehani bojoné Allahyarham/Jenaté Nini Kaji Saidem, agi cilik Ényong sering digawa dolan meng umahé Kaki Syeh nah kerna Ényong ésih cilik ya biasa petakilan dolanan gong atawa saron.
Budaya
Aja kaget nek budaya Jawa nang Kubangpari atawa wilayah Pamarican ésih kenthel mbanget contohé bae acara jabelan, sambatan, kenduren, lan lain sejabané. Artikel sakabeh budaya bisa diwaca nang edisi atawa terbitan sejen.
Kuliner
Ilat ora bisa dilombo meng endi bae nek ilaté cocok karo biasa madang karo panganan atawa masakan Jawa memang angel diilangna apa maning Ényong sing ésih seneng panganan Jawa walaupun Ényong seneng lan lewih cocok panganan Sunda sing akeh sayurané. Kuliner Jawa ora bisa ditinggna nang wong Jawa nang Pamarican contoh sederhanané anané tempe, jere Wikipedia.org tempe gue memang gawené asli wong Jawa. Pengrajin tempe tradisional sing dibungkus nganggo godhong gedhang ésih ana nang Kubangpari walaupun siki wis akeh sing nganggo plastik. Rasa tempe bungkus plastik karo bungkus gedhang pancen beda kerna cita rasa karo bungkus gedhang lewih alami lan jamur tempe berkembang alami. Legenda tukang tempe nang Kubangpari ana Allahyarham alias Jenaté Nini Suwuh karo nini Ciwek sing liané memang Ényong ora paham maning soalé wis suwe mbanget dadhi ora inget. Tapi sing inget memang Jenaté Nini Suwuh karo nini Ciwek soalé mamaku pernah dadhi karyawané. Pasar Karangcengek dadhi rujukan kuliner khas Jawa sing ésih lestari. Pasar sing dianakná kur dina senen karo kemis gue biasa nyediakna panganan khas Jawa kaya Cethil, Untuk Cacing, Lempung, Jawel/Ciwel, Tai Kuda, Klepon, Bubur, Gembus, Pecel, Gethuk, lan panganan sing liané. Akeh maestro panganan Jawa sing nang Ényong dianggap istimewa misalé bae pecel paling nikmat ne Bi War karo Bi Saliem, loronè gue ésih sedulur adi yayu (Wong Kubangpari edhek MIN Kubangpari), Gembus Nini X (Wong Karangcengek), Cethil Bi X (Wong Karangcengek), Cucur Allahyarham/Jenaté Nini Sulami.
Sebeneré ésih akeh aspek liané sing menarik go dibahas kur memang kerna keterbatasan utek lan wektu dadhi semené bae bahasan soal wong Jawa nang Pamarican atawa Kubangpari. Ucapan kesuwun spesial go Ang Rylo Pambudi anaké juragan gula sing wis ngingetna jenengan maestro panganan khas Jawa.
.
Komentar