Pamitan online via WhatsApp aring Kang Tenddy Nugraha. Segala hormat lan rasa kesuwun sing akeh mbanget go Kang Tenddy Nugraha lan batir liané.
Gua Pindul
Ora ana kesel ora ana ngeluh nang plesiran gie!! Mlaku ayuh mlaku tekan halte Transjogja edek swalayan (kelalen jenengané) takon ayo takon meng wong sing nang dalan lan pegawé Transjogja sing apik budhiné, njelasna sakabeh tetek mbengek transportasi go meng gua Pindul. Karo ndleng tipi acara sing terkenal nang TRENSTV acara My Trip My Adoh lumayan ulih kaweruh soal plesiran, acara rung bubar bis Transjogja jurusan terminal Giwangan wis teka. Alhamdulillah.
Masalah anyar ana maning nang terminal Giwangan. Ongkos meng Gua Pindul lumayan larang mbanget sekitar 130.000 rupiah per wong sampe tekan gua Pindul. Bingung arep diterusna apa ora mikir atos!! Mikir atos!! Mikir atos!! Akeh memang sing nawari go meng Pindul ora ketang wong telu. Internet dadi sumber berita ternyata ana sing ngomong murah dadhiné Ényong kur meneng gipit nunggu ana sing murah. Ijig - ijig ana sing nawari lewih murah maning kur 60-70 ewu tekan Pindul! Alhamdulillah ya Allah kersané Gusti. Jan langka mbanget wong soleh lan apik atiné nek nang Terminal nembe gie ana wong sing apiké poll.
Setengah jam nunggu langsung lunga meng Pindul. Saking kesel, panas, sumpek karo werna - werna langsung turu bae nang bus. Wis ngejog nang Wonosari (ibukota Kabupaten Gunung Kidul) bis balik maning meng arah dalan Pindul sing mlebu - mlebu adoh meng desa jan memang adoh mbanget jarak Yogyakarta tekan Wonosari - Gunung Kidul. Arep ngomong apa maning aring keapikané Bapak Supir bus sampeka njujugna tekan mlebu area wisata Gua Pindul padahal terminal Wonosari adoh banget karo Pindul. Maning - maning soal keapikané pak supir bis deweké sing asli wong Wonosari ngilangna tarikan preman - preman nang kono dadhiné Ényong ora mbayar jatah preman. Tekan Pindul pak supir langsung ngarahna Ényong meng pendaftaran lan takon penginapan. Ya Gusti Allah sing welas asih pendongané Ényong go pak supir sing apik atiné gue.
Weteng wis mandan perih tapi mburu wektu langsung bae tuku karcis go cave tubing nang gua Pindul lan body rafting nang kali Opak (nek ora salah jenengané). Ora let suwe jenenganku diceluk nang pemandu wisatanè. Kerna kur 3 wong tok dadi digabung karo wong lia men sekelompok ana 5 wong. Mas Fajar jenengané kang Jakarta karo pacaré wong Bekasi Alhamdulillah duwe batir anyar.
Dina Ahad memang bener - bener rame wong sing pada plesiran meng Pindul ora kur wong Indonesia thok tapi ana wong Jawa Suriname sing plesiran meng Pindul Ényong ge sampe kenalan karo ibu - ibu lan bapak - bapak asal Suriname sing ésih bisa basa Jawa. Ana rasa bungah kerna wong Jawa sing nang Suriname ésih bisa njaga basa Jawa lan budaya Jawa.
Mlebu gua Pindul rasané kaya mlebu meng endi. Rasa wedhi ya ana rasa penasaran apa maning rasa takjub lewih - lewih kerna ana pemandu dadhi ngerti apa sing ana nang Pindul. Sedurungé body rafting nang kali Opak Ényong dus - dusan alias siblon gipi nang gua Pindul (padahal Ényong rung ulih siblon nang dokter paru-paru) ngilangna larangan dokter Ényong nyebur bae ya memang ésih lara paru-paruné (bandel).
Pindul karo kali Opak ternyata adoh uga lewat kebon kayu putih lewati sawah ya lewat desa - desa. Body rafting gie lumayan adoh soalé lewih kang 1000 meter lumayan kan?! Nang kene Ényong mandan edek lan ana komunikasi karo mas Fajar asal Jakarta deweké takon itinerary Ényong tek jelasna bae aring deweké. Ealah Gusti Allah sing welas asih rejeki ora ana sing ngilangna mas Fajar ngajak meng segara Indrayanti bareng karo mobil Avanza sewaan deweké. Alhamdulillah Gusti. Bar ngomong werna - werna siki giliran anjrut kang jembatan sing duwuré 5 meteran lumayan sensasi adrenalin!! Ényong kur anjrut ping 4 - 5 tok kayaning nah nembe kur anjrut sekali tok sing kang 10-12 meteran wuuuuuih lumayan yah adrenalin ngucur deres!!! Rylo karo Zaenal ora gelem nyoba anjrut ya wes lah. Bar anjrut - anjrutan giliran lunga maning meng tempat karcis mau.
 |
| Segara Indrayanti - Yogyakarta |
Segara Indrayanti
Bilas sing bersih lan ganti klambi sing ésih bersih siap - siap lunga meng segara Indrayanti karo mas Fajar. Ényong mandan rikuh aring mas Fajar sing mulia mbanget atiné Ényong kur nawari bensin tapi deweké ngomong ora usah soalé bensin wis ditanggung nang rental mobil dadhiné go nutup rikuh Ényong sing mbayar karcis mlebu segara ya kira-kira 90.000 rupiah go wong 6.
Sedina rung madang metu mobil langsung ngoleti warung makan pesen jangan kangkung karo gorengan urang laut jan nikmat mbanget!!! Selain nikmat tur murah urang laut tuku setengah kilo kur 30.000. Bar wareg langsung meng pesisir sing memang mandan curam langka wong sing adus ya mbok kur ana 8-15 wong sing adus gue ge adusé kur sebatas pupu (paha). Pemandangan Indrayanti seayu jenengané.
Srengengé mingslep langsung balik Yogyakarta. Sepanjang dalan pada turu kabeh saking keselé (terlalu lelah). Nyambung maning ya....
Komentar