Repek?! Jal apa artinè? Nek bocah siki mbuh ngerti mbuh ora istilah gue soalè apa wis jarang wong sing repek. Yo wes tek jelasna gipit apa gue repek. Repek yague kegiatan wong golet kayu nang tegalan atawa alas go genen. Repek memang istilah sing spesifik go golet kayu genenan. Beda maning nek golet kayu go gawe umah atwa go kebutuhan liannè.
 |
| Pawon Go Genen |
Nengapa jarang wong sing repek Kang? Soalè apa wong siki wis ra nduwe pawon siki pada diganti karo kompor lenga tanah (taun 1980-2000) apa maning jaman siki pada nganggo gas. Mbien jaman enyong cilik esih akeh wong nang desa pada repek meng tegalan atawa meng alas soalè sakabeh wong nang desa esih nganggo pawon.
Wong-wong biasanè repek nang tegalan pinggir kali Citalahab. Kayu apa bae dijiot go genen. Misalè bae nek repek nang tegalan pinggir kali biasanè ulih klari, cumplung, blukang atawa kayu tutuhan. Selain repek nang pinggir kali, wong Kubangpari biasa repek nang gunung Gegerbentang nek ra Gunung Lor. Repek nang Gegerbentang ana musimè dewek. Pas perhutani agi panen kayu jati nembe wong-wong pada repek. Sekali mangkat repek balikè ulih semobil kolbak.
 |
| Repekan Blukang, Klari, Karo Cumplung |
Cerita repek ora kur sekedar repek tok tapi jarè wong mbien gue akeh sing nemukna khewan gaib atawa khewan sing siki langka. Misalè bae soal wong repek nemukna macan tutul karo anakè, ula segede wit gedhang, menjangan atawa kidang. Akeh wong sing nduwe pengalaman ketemu karo ula gedhe biasanè langsung mriang pas balikè. Ya sakabeh gue anu cerita wong mbien. Arep percaya atawa ora ya karepè sampeyan.
Komentar